بنوتة جميلة عمرها حوالى 18 سنة جاية استقبال السموم بتشتكى من ترجيع متكرر ومغص شديد في البطن
بسرعة قمت ابص عليها و البنت مفيش نبض ومفيش ضغط الدم ، وباخد history البنت واخدة قرص غلة (أقراص بتستخدم لقتل الفئران )
بسرعة ابتدينا شغل مع الحالة وعلقنا محاليل وركبنا رايل وعملنا غسيل معدة ووفرنا مكان عشان ننقلها العناية المركزة وفى طريقنا للعناية كانت البنت مستغربة اللى احنا بنعمله ومندهشة من رد فعلنا فى التعامل معاها وفى الحقيقة انا كنت مستغربة انطباعها ده لحد ماسألتنى السؤال اللى فسرلى الدهشة دى والسؤال اللى وقفت عنده ومابقيتش عارفة ارد اقولها ايه ؟؟؟؟
وكان السؤال : هو انا هموت يا دكتورة ؟؟
وقفت مش عارفة اقول ايه ؟؟؟ وبسرعة جدااا قبل ماافكر فى الاجابة كملت البنت السؤال بجملة كانت اصعب من السؤال نفسه " انا مش عاوزة اموت يا دكتورة انا مااعرفش ان القرص ده بيموت انا واحدة صحبتى نصحتنى بيه وقالتلى هتروحى المستشفى وهيهتموا بيكى وهيعملولك رسم قلب كتير وتطلبى من اهلك اللى انت عاوزاه " قالت الكلام ده حرفيا !!!! وتركتنى البنت مابين حيرة وصدمة شديدة بين الحالة نفسها والتعامل معها طبيا وبين الصدمة من نصيحة الصديقة وبين رد فعل البنت اللى نفذت الفكرة وبدون تفكير وبين صدمة الأهل فى كلام بنتهم ..؟؟!!
تم نقل الحالة الى العناية وتم التعامل معها ووضعها على جهاز المونيتور واعطاؤها الأدوية المحفزة لعمل القلب وتم عمل الموجات الصوتية على القلب وكانت كفاءة القلب ضعيفة جدا والبنت امامى بتدهور حالتها وتتجه نحو الموت ومازالت تبكى وترفض فكرة الموت
تراكمت الافكار وتزاحمت المشاعر بداخلى مابين مايمكن عمله للحالة ومابين دعائى لها ان تنجو ومابين نصيحتى لها بالاستغفار وذكر الله ومابين ذهولى الشديد من رد فعلها
واستمرت الحالة فى التدهور الى ان توقف القلب وعملنا CPR ولكن للاسف دون جدوى
اتوفت البنت خلاص واللعبة قلبت جد ......
والحالة دى علمتنى ان علاقة الاهل بأولادهم ممكن توصلهم لأنهم يخسروهم وان التربية السليمة القائمة على الدين القويم وحسن المعاملة ممكن تنقذهم وتغير حياتهم ....
طبعا لا مجال لكلمة لو .....
بس البنت دى لو كانت عرفت تتفاهم مع اهلها وتوصل معاهم لحل ، ماكانتش لجأت لصاحبتها اللى نصحتها بالنصيحة دى
الحالة دى فيها معانى و دروس مستفادة كتير اوى بس اكتر حاجة عاوزة اقولهالكم هى ان التربية هى الأساس ..
قربوا من ولادكم .. قربوهم منكم .. خلوهم يلجأوا ليكم بدل مايروحوا يطلبوا النصيحة من حد برة .. عرفوهم دينهم الصح .. أحسنوا إليهم